قميص مشمشي

عندي صاحب بده يخطب، اجى لعندي امبارح،وفجأة سألني وقال: يازلمة عمرك شوفت عريس معهوش حق بدلة؟ فقلت: عادي يا زلمة،بالاردن كل اشي بصير،بس شو عبال الضيف؟فقال:بدي من عندك بدلة. وبعد ما اختار بدلة مناسبة لهالمناسبة، سألني: ما بلاقيش عندك قميص مشمشي؟ بدي اياه عشان فستان العروس مشمشي، وبدي لبسنا يكون متناسق. فجاوبته: بدك تخضع للحكومة تبعتك من اولها؟وبدل مصيبة حكومة تصير بمصيبة حكومتين،ولك منوين اجيبلك قميص مشمشي بوطن ما فيه على لسانه غير سيرة الخوخ. قمنا ونزلنا عالسوق نشوفله قميص مشمشي، ظلينا ساعتين نلف وما لقيناله طلبه،الا قميص واحد قياسه كبير،فقال: بدي اشتريه واقيفه تقييف. قلتله: ولك البدلة شحدة والكندرة شحدة والكرافة شحدة والبدلة شحدة والقميص تخبيص،ما بتزبط معك،اصبر لبكرا وبنشوفلك قميص ع مقاسك،اقل ما فيها عشان تحس انك لابس اشي من السعادة الحقيقية،مش سعادة كلها تزييف وتقييف. المفاجأة كانت ان كل التجار اللي لفينا عليهم،قالوا ان اللون المشمشي مشكلة معظم العرسان،بدهم قمصان بهاللون عشان فساتين خطيباتهم المشمشية،وبعده العريس من يومين مش ملاقي قميص مشمشي. والله بهالبلد مش عارفين نلقاها من حكومتنا والا من حكومات فساتين المشمش، ومالها فساتين النيلي والبني والكاكي والكموني. بنلبس مشمشي عشان عارفين ان فرحنا وسعادتنا كلها عبارة عن ليلة مشمشية ما بتتكرر،بوطن صارت احلامنا فيه كلها بالمشمش. دولتك،، هالشب بدهوش شقة،بده يسكن بخيمة من تبعات اللاجئين،ترا نص الأردن عندها خيم لعوزات الزمان،ولا بده تكاليف صالة، بده يعمل الحفلة بقاع الدار،ولا بده حق كنافة، بده يوزع مندلينا وكلمنتينا ارخص. بس دخيلك،اذا اتكرمت علينا دولتك،ما بنلاقيش حواليك قميص مشمشي مقاس ميديوم لهالعريس،وخلي هالخطبة تمضي على خير ؟؟ وجيرة الله تراك معزوم،بدنا تشرفنا وتشوف كيف بنستقرض سعادتنا قرضة بأهم لحظات عمرنا وبلكي قدرنا نمون عليك وتغنيله يا عين الله عالعريس يا عين الله عالعريس مزيون ولابس قميص مزيون ولابس قميص