راسين على مخدّة

. اللي بقول ان احنا ما بنحب الخير غلطان، واللي بقول ان ماتت فينا النخوة، والشهامة، غلطان. احنا لبعض، وبنساعد بعض، وبنبني بيوت بعض، وبنساهم بخلق نسل، وذرية لناس حتى ما بنعرفهم. كلنا بنعمل الخير، ولما بنشوف حدا بسألنا بتعرف دار فلان؟ بنفهمها وهيه طايرة انه بسأل عشان يشوف وضعهم كيف، داخليا، وخارجيا، واخلاقيا، واجتماعيا. بنفهم على طول أن فيه عريس اتقدم لبنت بتخصه للي بسأل، وبده يستفسر عنه، وعن اهله قبل يردولهم جواب. ما شاءالله عليهم، ناس أوادم وطيبين، احنا واياهم جيران من 40 سنة، ما يوم سمعنالهم حس، بصوموا، وبصلوا، وبخافوا الله، اصحاب واجب، لا بتدخلوا بحدا ولا حدا بتدخل فيهم، والولد ما شاءالله سمعته مثل المسك بالحارة، ما بقطع فرض بالجامع، و رضي والدين. بروح الزلمة ع ناس ثانيين بالحارة، بحكوله: اتوكل على الله يابن الحلال، هظول الجماعة من المبشرين بالجنة، بعطفوا ع اليتيم، والفقير،والمسكين، واخلاقهم عال العال. وبصير النصيب، بخطبوا وبتزوجوا، وبنكشف المستور، والمشاكل بتثور. ممنوع تطلعي، ممنوع تروحي، ممنوع تيجي، شغل مافيش، زيارات ما فيش، امك اختك خالتك صاحبتك ما خصنيش. الموز بالحبة، والتفاح بالحبة، والبندورة بالحبة، وحياته سهر، وروحات، وجيات، تعاطي وعقد نفسية. اخلاق زي العمى، وبهادل،وقلة هيبة،وحياة شرشحة. بدي فستان، كف، بدي بلوزة، كف، بدي بنطلون، كف. الام بدزّه، والاخت بتوسوسله، والأب ما خصه. خطيّة كل اثنين بصير بينهم مشاكل، برقبة كل انسان انتخى بشهادة زور، ومدح قريبه، وصاحبه ، وابن جاره، وابن عيلته. خطيّة كل بنت عانت من زوج فاسد، واهوج، واعوج، برقبة كل انسان اتبرع يكون فاعل خير بالكذب، والخداع. خطيّة كل بيت انهد، انبنى على اوهام مزيفة، برقبة ناس حاولوا يلعبوا ادوار البطولة بتدخلهم بحياة غيرهم بمفهومهم الغلط ل نيال من جمع راسين على مخدة