الهوية الأردنية والثقافة الوطنية

بعد فضيحة فيديو الجامعة الأردنية، وبما أنه دوكوا اياه الجو ربيعي يا محلاه، فنصيحتي لكل أهالي طلاب الجامعات : لازم تعملوا حصة ثقافة عامة بالهواء الطلق لاولادكوا وبناتكوا اللي بالجامعات، واللي بعرفش علقوا مشنقته بغابات برقش وعجلون، بلاش تشنقوه، اتركوهم بين الشجر وروحوا، بلكي الخوف أعطاهم حافز للتفكير. والله عيب، مين قال ليهم، فيه ثورات انطلقت بالأردن، ليجاوبوا بتواريخ غريبة عجيبة عن الثورة العربية الكبرى؟ احنا ما صار عندنا ثورات، بلدنا انخلقت بنظرية داروين من العدم. الهي يعدم اللي كان سبب هالجهل. علموهم إن ايران ما التحقت بجامعة الدول العربية أبدا، لأن كانت ظروفها صعبة، وما معها تدفع رسوم، فاتجوزت وقعدت بالدار. يا بتقعدوهم بالدار ويفتحوا مجال لناس بتفهم، مش ملاقية مصاري تقرا. معقول هيك شباب، بعرفوا عن حرب سوريا، وخطر إيران، وعن داعش والدمار. لما يقولوا يحد الأردن من الشمال السعودية؟ ومش بس ما عرفوا مين رئيس أول حكومة أردنية، لكن حذفوا 50 سنة من تاريخ الأردن بين فترة أول حكومة بسنة1921، والفترة اللي استلم فيها وصفي التل الحكومة بالستينات عينك عينك. حتى دولة النسور بعرفهوش، لو مطرحه بستقيل، الله اكبر ، والله اهانة، بعد 4 سنوات خدمة رفع، بعرفوش دولته. مش عاجبهم لا الحكومة ولا النواب، وبدهم اصلاح، مش عارفين مين وزيرهم، ولا عارفين عدد مقاعد مجلس النواب. اصلاح شو؟ والله لازمهم مراكز إصلاح وتأهيل هيك جيل. ما كان عندنا انتداب ولا استعمار. مهو احنا الدولة الوحيدة بالعالم، اللي طول عمرها صاحبة سيادة على اراضيها، فما كان فيه عندنا يوم استقلال مثل باقي الدول ليعرفوه. ومعركة الكرامة مش عندنا صارت، هاي صارت أيام كان فيه بلد اسمها الأردن، وكان فيها نسوان مدقدقات يربن زلم، مافيش داعي يعرفوها. بالله عليكوا، علموهم معنى الثقافة الذاتية، بدناش يطلعوا نوابغ، لكن أقل ما فيها يحسوا بهم الوطن، ويكون عندهم شوية ثقافة وطنية، لنحافظ على هويتنا الأردنية.