نفطيش وبتروليش اللي بنتهاوش عليه؟

بعدني بتذكر كلام دكتورنا ايام الجامعة بمادة الطب الشرعي، لما قال : لا تصدقوا الناس اللي بتشوفوهم بالافلام والمسلسلات، لما واحد بصير معه حادث، بفقد الذاكرة اسابيع وشهور وسنين، لأن الوضع الطبيعي ان الذاكرة بترجع لحالها للانسان بعد اسبوع. ما بعرف اذا كان كلامه صحيح او لأ، شو بفهمني بالطب، تخصصي حقوق واخذتها لارفع معدلي وندمت اني اخذتها، لأن ولا فهمت منها اشي غير هالمعلومة، واذا كانت غلط فخطيتنا برقبته. لكن اذا كان كلامه صحيح أنه الذاكرة بترجع بعد اسبوع، ليش احنا الشعب الاردني فاقدين الذاكرة ع طول؟ عندنا جبال بوتاس وكأنها جبال اوراس من كثرها وكبرها، ومحشية حشي ومش شايفين منها اشي. عندنا جبال فوسفات بتطمر محيطات وبحور ولا مبين علينا اشي. عندنا جبال الطفيلة بتلمع لمع من الصخر الزيتي، ولا مستغلينها ولا مقربين عليها. عندنا سهول حوران بتخلينا نعبي كواير (جمع كوارة) وشوالات خط احمر مصاري، ودوكوا اياها عملوها مخيمات. عندنا الغور بكفي الأردن وبلاد الشام والخليج بندورة وبطاطا وزهرة وبيتنجان وملفوف وخبيزة، ومع هيك اهل الغور افقر ناس بالأردن. عندنا سياحة طبيعية وعلاجية تركناها واهملناها، وصرنا نستثمر بالسياحة الجنسية. عندنا وعندنا وعندنا وتاركين كل اشي، واللي مستغلينه، كل مصاريه رايحة فساد بفساد، ورواتب مديرين ومجالس ادارة. تاركين الزراعة والصناعة والسياحة والموارد المنهوبة، وكل شوي بنبلش ببعض، فيه عندنا نفط والا مافيه نفط. نفطيش وبتروليش وليش بدنا اياه؟ احنا بننسى ان لو بدهم يطلعوا بترول كان طلعوه من الخمسينات والستينات، وبننسى سيطرة دول الخليج ع الشركات الباحشة واسواق النفط، وبننسى ان بلاعبوا فينا بسياسة العصا والجزرة، وكل فترة بزتولنا كم ليرة ليسكتونا فيهن. لقوا بترول بالضفة والبحر الميت والا ما لقوا، مش رايح يتغير علينا اشي، وحتى لو فيه بترول بنص عمان، شو بدنا فيه؟ احنا بننسى ان زمن البترول راح، وكل الدول النفطية بتوجه طاقاتها لخطط بديلة للبترول. احنا بننسى ان من هون لتقرر دول الخليج أن حكومتنا تحكي الصحيح، وتعلن للشعب عن اكتشاف حقول نفط بمعان والعقبة والبحر الميت ووادي شعيب والجيزة والازرق والغور، بكون وقتها حق برميل النفط قد حق كيلو بندورة بعز الصيف، ( 5 قروش ) خمسة قروش فقط لا غير. نفطيش وبتروليش اللي بنتهاوش عليه.