سهرة نفاق

أبو نمر: سمعتوا يا جماعة الخير اخر خبر؟ أبو سليمان: خير ان شاءالله، خبر شو؟ أبو نمر: النائب... بده ينزل للبرلمان الدورة الجاية. أبو يوسف: والله اذا بصير جاي علي بده أصوات غير أقلب الدنيا فوق راسه. أبو قاسم: فكونا منه، صندوق السيارة دايما مفتوح للهدايا والرشاوي. أبو توفيق: يا جماعة الخير، مش بس .. اللي بعرفه عنه، أنه قال لناس بده يزبطلهم شغلة، لهط منهم 10 الاف دينار، وبعده بوعد فيهم، عدا عن اللي بقبضه من الجاهات والصلحات. أبو الخير: هلا هلا، ما ظل علينا غير ابو المناسف، بده يوظف فلان، وبده ينقل فلان، وبده وبده. أبو أحمد: والله انا قبل كم يوم بهدلته، كنت ماشي بالشارع، وهو نازل من السيارة، رد علي السلام، قلتله اهلين وظليت ماشي ولا عبرته، خليته مثل اللي مكبوب عليه سطل مي باردة. أبو جمال: الله يلعنه، ويلعن اللي بده يعطيه صوته المرة الجاية، قضاها نايم بالمجلس، كلمتين ع بعض ما سولف. أبو سليمان: استنوا يا جماعة تا نشوف مين هالضيف اللي جاي يعزي، مبين عليه مهم. أبو أحمد: هااااه، ولكوا خاف الله انه سعادة النائب ... أبو نمر: اه والله هو، قوموا قوموا تا نستقبله. أبو قاسم: هلا هلا سعادتك، نورتنا وشرفتنا، اقعد مطرحي. أبو توفيق: زارتنا البركة سعادتك، لا والله غير مطرحي. أبو يوسف: لا والله غير مطرحي. أبو سليمان: اتفضل القهوة سعادتك، والله انك تاج راسنا، والكرسي ما بلبق غير ليك. سعادة النواب :
لا تشيلوا هم، خامين والا مليحين، وقفتوا مع الشعب والا ما وقفتوا، منتخبينكوا منتخبينكوا. #تنويه :
لا علاقة للاسماء الواردة بالمنشور واحداثه بالواقع الأردني، وأنما هي من وحي خيال الكاتب.