قرار فرد العضلات

نيسان ـ مرة من المرات أيام ما كنت لسه بلعب حجلة، إنعزموا أهلي لحضور عرس في قرية مجاورة، طبعا أبديت رغبتي بالذهاب معهم، حلفوا يمين مابروح، وإذا بتحرك غير يكسروا رجلي، ظليت أناور بلكن وافقوا لكن كل محاولاتي ذهبت سُدى أمام تعنت عمتي وجدتي، طبعا لو العرس بقريتنا مش بحاجة لكل النقاشات لأنه بنروح بدون صدور قرارات عليا.
إجا العريس بسيارته الديانا يأخذ صاحبات الصون والعفاف، وأنا لما بعاند بيطلع معي عقلي الصحراوي،قررت اروح، لكن كان من الصعوبة الوصل لكندرتي لأنها بالغرفة اللي قاعدات يلبسن ويتكحلن فيها، وزمان زي مابتعرفوا ماكان عنا "كنادر" كثيرة، تسللت ونطيت بقفص السيارة ولبدت بالتنده، بحيث يستحيل على الأقمار الإصطناعية العائلية التقاطي، طلعن النشميات وركبن جنب العريس وشغلوا شريط المجوز، لما وصلنا ظليت هامدة لما نزلوا بعدين حولت واختفيت بين الناس عشان ما تشوفني عمتي وهي شابكة على رأس الدبكة، حضرت العرس حافية وكشتي طايره، وشكلي فضيحة لو حدا عرف أني بخص المزيونات.. بالترويحة ركبت مع جيرانا ورحت وقلبي يخفق من الخوف.. كان قرار اهلي مجرد فرد عضلات ضدي ورسالة أنهم بيقدروا ينفذوا إرادتهم، وكمان قراري فرد عضلات بوجه تعنتهم العبثي، تماما نفس قرار الحكومة فرض تغيير التوقيت بعز الشتوية لدرجة يمكن الناس هسه بيكملوا لبس كنادرهم وهم بالسيارة.. لله درنا شو عقولنا صحراوية