سمك لبن تمر هندي

نيسان ـ راحت علي نومه اليوم ، ماصحيت غير على آذان الظهر، يمكن لأنه مكسور عليّ نوم وكمان مبارح ماشربت غير فنجان قهوة صغير وكاسة سفن آب. الحاصل قمت من حلم بسم الله الرحمن الرحيم، قال طيارة تركية وقعت فوق دار بجنب دار جدتي.حكالنا زلمة من المتجمهرين اضربوا الطيارة بالكنادر عشان تخف حدة الإنفجار وما يتأذى بيت الجدة.
كنا ناس كثير نطوش كنادر، حتى آخر شي رمينا اللي برجلينا، بس ماانفجرت الطيارة، نط زلمة ثاني وقال ياجماعة هاتوا مي بلكي طفيناها أحسن، لأنه ما في غير خيط هالدخان طالع.... بلشنا زق مي بالطول والطناجر وحتى الصغار شايلين غلايات القهوة ... لا حدا يسأل طيب وين الدفاع المدني و يدخلني بفزلكات أين حقوق دافعي الضرائب؟لانه هذا حلم لا يحكمه المنطق وثانيا جملة دافعي الضرائب جابوها الجهابذة اللي عنا من الصحافة الأمريكية عأساس واَو ناسيين انه احنا مندفع خاوات مش ضرائب.
صحيت ريقي ناشف بدون البت في قضية سقوط الطيارة.، صليت الظهر و دحلت حالي عالكنباية اتفرج عالتلفزيون، بلشت تنعوس عيني، كأنه ماخذه منوم، قلت يا اللا يابنت بلكن كملت الحلم الأولاني.
فجأة وإذا آلاف من الناس، يمكن حتى انتوا جماعة الفيس كنتوا معنا، أمة كلنا بنركض، هاجين هجيج بحرش، غابة بالمواصفات الأردنية، جنب مني يركض رئيس وزراء، راجع بصحته وعمر شباب، نفس مشهد الخيول الكثيرة اللي تركض في ناشونال جيوغرفك، ماكنا عارفين من شو هاربين ولا عارفين وين رايحين، والصغار بيبكوا عشان ما اضيعهم.. رئيس الوزراء حكالي كلمتين، بقدرش احكيهن بصراحة، جبانة زي زي ملايين مملينه.... عارفة انه فش حدا يقرأ هسه الزلم رجعت من الشغل تعبانة ونامت والستات قامن عالمطابخ.. وتوت توت وديني ع بيروت.