نوادر جدي

نيسان ـ زمان أول كان لما يجي ضيف غريب على القرية تتم دعوة كل رجال القرية عشان يتعشوا مع الضيف، طبعا العشاء مناسف مو جبنة وبيض ولبنة، حضر الضيف وحضر واجبه.
الحاصل، في زمن خير ولى نتمنى له سهولة العودة لديار الأردن، ضاف على قريتنا رجل من عرب ما ، راح جدي للعشاء مع باقي وجوه الربع، أثناء تناول العشاء، زل ستر الله وغص الضيف بلقمة، طبعا في هكذا حالات الكل معازيب، ميه بساع يارجال، بساع غص الضيف، قال جدي وهو كالعادة يبتسم، لا لا تجيبوا مي خلوا بلكن مات احسن... بعد ما اسقوا الضيف وخلص من اللقمة اللي نشبت بحلقة، فطنوا لطلب جدي بالتعليلة عقب العشا، قالوا ابو سالم والله ما قلت كلمتك بلا معنى، شنو كنت تريد من هالفنتك، ياشين ما احنا نبلش لو فرط الرجل عندنا.. قالهم لو مات وهو يأكل كان طلعت علينا إشاعة زينة بين كل عشاير العرب قالوا الزلمة مات عند السردية من كثر ما اطعموه مناسف، من كثر ما أكل من خيرهم... علواه لو محمد رمضان يعتزل الغناء والتمثيل بعد مايغني عندنا، عشان تطلع علينا إشاعة بين كل الدول ويقولوا الأردنه ابشموه بالمصاري والطرب بعد ما غنى عندهم...!وانتهت التعليلة والضيف ومعازيبة يتندرون بلطافة النكتة .. !!