أبو زقمك ياتوني

نيسان ـ مرة قرأت خبر أنه في عائلة بدولة اجنبية اشتكوا على عيل رضيع لجيرانهم كثير البكاء مما يسبب لهم الإزعاج، وقتها استغربت القصة.. انداري حدا يشتكي ع عيل.. الأجانب مجانين. ؟!
اليوم سمعت نفس القصة بس بصورة أغرب شوي ، صاحبتي عندها "بسيس" صغير أسمه توني، بصراحة موفرتله كل سبل الراحة والحياة السعيدة،حتى احيانا بغار منه، ياكل مرتديلا يونيوم اللي ما ذوقتها غير عكبر.. ومراجعات دورية -والدفع كاش-عند طبيب بيطري، ... احكيلها في ناس مو صاحلها عيشة هالبسبوس ترى ، مع كل ذلك" تويني" الخبيث متسلط عالجيران، كل ما انفتح الباب يتسلل ويروح يقعد على كرسي مرجيحتهم.. هو بصراحة ما عندها حديقة ومرجيحة..والبسبوس أكابري وعليه" دبلة"... جارة صاحبتي حكت معها بطريقة جافة مهددة.. بصراحة إذا ما ضبيتي بسك رح اروح اشتكي عليك عند المحافظ...
- معقول يا بنت اللي تقولينه.. حدا يروح للمحافظ عشان بس ؟!.. قولي وغيّري.. ..
= والله ما أزل عليكِ بحرف..
- طيب هي جارتك عندها بسه شي.. بلكن البس هويان ؟!
= لا والله.. بس توني متسلط على مرجيحتهم...
طيب شو رح تقول للمحافظ ؟!.. وأنا استمع للقصة كنت افكر برد فعل المحافظ أذا فعلا اشتكت الجاره... طيب والحل.. توني مراهق وغلط....ياسواد الوجه.. طيب اذا وقع الفأس بالراس واضطرينا لواسطة، أنا رح اتكفل مين.. توني وللا صاحبته؟!..
الله يشغل بالك يا توني مثل ما شغلتنا... اسمعي يا بنت الحلال .. من بكرا روحي اشتري مرجيحة وتحطيها بالدار خليه بلكن قعد وانطم، مو ناقصك وجع راس أو زتيه عند حاوية خليه يتربى ويشوف البساس شلون عايشه، صارت تأكل قشور بطاطا من الضيم...
وحياة الله إشي يمخول.. معقول يصير قضية وجلسات ومانشيتات وعواجل أخبار ؟!!!
عموما.. اللي يعيش ياما رح يسمع ويشوف بالدنيا...
*هويان : ذايب عشق
*دبلة : كبر وخيلاء