سواليف الفجرية

من عادة أهل الريف بالمناسبات، انه بجتمع فيها الختيارات، الخوات والعمات والخالات، اللي مجوزة بعجلون واللي بالسلط اللي بالكرك واللي بالمفرق واللي واللي.
عرق النسوان دساس،واذا بدنا ندقق بمجتمعنا، بنلاقي نص الاردن بقربوا لبعض، انداري ليش بنظل ندق بخناق بعض وبنتهاوش مع بعض.
المهم لما بجتمعن الختيارات،بنامن كم ليلة عند المعازيب، بلاقنها فرصة لم شمل، ويعيدن الذكريات، فكل يوم الفجر بتصحى ع همهمات الختيارات.
اصوات ختيارات بتهلل، واصوات بتنادي، اصحي يا حجة، اصحي توضي، قرب يوذن الخطيب، بقومن الحجيات بتوضن وبصلن، وببلشن سواليف بعد الصلاة والتسابيح.
زكية :قومي صحي شاهر يا غبصة،اكسبي فيه اجر، صحيه خليه يقوم يصلي.
رسمية :خليه نايم يا حجة،شو بدك فيه،هظول الشباب بتأخروا بالسهر.
كردية :بتلاقيه بسابع نومة،حزين طول الليل وهو يحلم، اسمعه يهمهم وشو بقول، ما افهمش عليه.
عريفة :يهمهم شو يا حجة،بتلاقيه حاط السماعات بأذانه وبحكي تلفون طول الليل، هالتلفونات لا خلت حدا ينام ولا يصلي، هالجيل كل واحد ماسك تلفونه بايده ورامي راسه، اذا فيه ناس حواليهم ما بدروا.
زكية :ابو التلفونات ابو اللي اخترعوها،هظاك اليوم ابن ابو الفلافل طلق مرته عشان التلفون.
نبيهة :لا ترديش يا حجة،طلقها لأنه امه هيك بدها، كانت بدها اتجوزه بنت خالته، وابوه اخذله البنت من غير خاطر امه، وظلت وراها وراها، يوم يتهاوشن ع الغسيلات، يوم ع الجليات، يوم وين رايحة ووين جاية، وجوزها ابو اذان مثل الحمار حيشاكن، بسمع لأمه وخواته وهنه ليل نهار زن زن بأذانه، هيك سوت مرتك وهيك عملت.
رسمية :هيه دخلك،خالته للولد بعدها عايشة والا ماتت؟
نبيهة :وين علمك انتي،صارلها 3 سنين ميتة، جلطها ابنها، حط عينه ع بنت من عمان، وضحكوا عليه اهلها، دفعوه مهرها 50 الف، قال شو يا خيتي، البنت قارية تخصص مافيش منه، اخذ قروض وشحد من هون واتداين من هون وما كملوش السنة مع بعض، وهظاكوه مرمي بالسجن من ورا الشيكات والديون.
فندية :انداري عن قلة عقل هالناس هاي، الواحد شو بده لابنه والا بنته غيرالستيرة، الناس بتحسب قديش كلفت قرايتها، وقديش صرفوا عليها لبس واكل وشرب، وناس بدهم بس يزموا بنات ويشيلوا وما يدفعوا ولا اشي، وبالاخر بهينوهن.
هون وحده من الختيارات بتكح،بصفنن فيها و بوحدن الله وبتضيع السولافة وببلشن سولافة جديدة.
وعلى هالحالة،سواليف خاشة وداخلة ببعض، والسولافة اللي بتنفتح، بكون عنوانها "يتبع بحلقة قادمة".