أوعدينا تتقشفي
شاهر الشريدة
كاتب أردني
نيسان ـ نشر في 2015-12-25 الساعة 13:42
اليوم جارتنا كانت قاعدة مع أمي بحوش الدار، وسمعتها بتسولف انه امبارح كانت بعمان بمراجعة بمستشفى البشير، عشان مرارتها بتوجعها.
كانت جارتنا تقول :
حيالله ياخيتي،هالحرمة طلعت بالسرفيس معها اطفال اثنين وقعدت جنبي، حرمة خدودها مثل حب التفاح من قد مهو مبين عليها النعمة، واولادها مبين عليهم مش وجه بهدلة، طول الطريق وهمو يتمحنوا.
وقالت:
لما وصلنا المستشفى ونزلنا من السرفيس، صارت الحرمة تصيح ع الاولاد، ابوكوا ع ابو اللي خلفوكوا ع ابو اللي عرفني عليكوا، فضحتوني، فأمسكت واحد من الاولاد اساعدها فيه، وصرت اهدي فيها واقوللها ع مهلك عليهم يا مستورة، مش غشيمين اولاد احنا.
ولما دخلنا المستشفى،حيا الله ياخيتي التقت المستورة مع وحدة ثانية، صفنن ببعض وصابتهن خرسة، تقول شافن اشباح.
شوية واللي لقيناها هناك، سألت الحرمة اللي معي: ليكون جوزك كمان مثل جوزي، سحبوا السيارة منه؟
اللي معي ردت عليها:
لو ظلت ع سيارة الشغل بسيطة،سحبوا منه السيارة، اخذ سيارتي وطرد الخدامة و الشوفير، وحكى مع تاجر سيارات ليوخذ سيارته يبيعها.
يسولفن وانا صافنة مش فاهمة شو السولافة غير انهن بنات نعمة، وظلن يسولفن، هاي تقول: جوزي حكالي ع السنة الجديدة بده يحط الاولاد بمدرسة حكومية، وهاي تقول: وانا حكالي ممنوع عيادات ومستشفيات خاصة.
وحدة تقول: جوزي قلي تقشف حكومي وتخفيض رواتب والغاء مصاريف زيادة، والثانية تقول: وانا حكالي اتكيفي او بتروحي ع دار اهلك.
وعند سيرة التقشف،جارتنا سأليتهن: هو انتوا اهل عمان بتتقشفوا مثلنا؟ فمجاوباتها: والا كيف شايفيتنا هون لولا التقشف، هيك بده دولة ابو زهير، الله يلعن اليوم اللي صاروا فيها زلمنا وزراء وخلونا نعرف التقشف.
فجأة، انا صحيت من النوم ع صوت أولاد اختي وقمت اتحمم وأنا أفكر :
كيف بدها تنضبط المديونية واللي بنتقشفه احنا، برفعوا رواتبهم فيه، وبشتروا فيه سيارات جديدة وبغيروا اثاث مكاتب، غير عن المياومات والطشات وشمات الهوا.
مهو مش معقول بتقشفوا مثلنا مثل ما سولفت جارتنا بالحلم، ولا معقول الوزراء والمسؤولين بشتروا كل واحد كم عبطة ملوخية بوقت الرخص وبنشفوهن ع ظهر الدار، وبقضوا طول السنة يوم ملوخية، يوم عدس يوم خبز ناشف.
مش معقول اولادهم يروحوا ع المدارس والجامعات بالسرفيس، مش معقول يقضوا حاجاتهم بسياراتهم الخاصة، ولا معقول يشتروا بانادول من صيدليات الحكومة.
شغلة وحيدة بعدني مش فاهمها من بين كل كلام دولة الرئيس عن الجباية والتقشف، مش فاهم شو يعني خطته بضبط المديونية ب 2017، هو دولته بده يظل قاعد و يجبي لهظاك الوقت؟
اجبي دولتك اجبي،،
انت اجبي واحنا بنتقشف، بنتقشف وبنتكشف بعد.
لكن إذا ما اجت حسابات الحقل مع حسابات البيدر، اوعدنا تتقشفوا مثلنا.
