ع شو اليابان احسن مننا

نيسان ـ

بقولوا فيه باليابان وزير مقدم استقالته،عشان غلطان بتقدير تكاليف تجهيز ملعب فطبول، يعني حاسبها غلط الأخ، مش بس استقال، لكن مرجع للدولة رواتب 6 شهور سابقة.

هاي اليابانيين طلعوا بغلطوا بالحساب،وليل النهار واحنا فوق اليابان تحت اليابان، وبحسبوا الوقت بالثانية، وبحسبوا المصاري بالمليم.

مرة أمي غلطت بتقدير كمية الملح ع القلاية،ابوي كب الاكل فوق روسنا وظلينا بالجوع اسبوع.

ابن جارنا مرة باع كوم التبن بأرضه،واخذ ثمنه،ولما المشتري عباه بشوالات، طلع الشب غلطان بتقدير كمية التبن، فالمشتري اخذ 3 شوالات ببلاش.

هالشب ابوه حرمه يفوت الدار 3 شهور،وظل يوخذ راتبه ل 3 سنوات،ولولا العيب بخلي اهل الدار يوكلوا تبن ل 3اسابيع بدل ال3 شوالات.

فعلى شو ضاربين اليابان بحجر كبير،وانهم بفهموا اكثر منننا، احنا سابقينهم بكثير ومن زمان.

اليابان ممنوع عندهم الرسوب للصف الثالث،وبعلموا فيها الاخلاق،احنا كمان بنظل نعلم الاخلاق للجامعة،حتى لو ما تعلمناها،المهم الفكرة.

همو بغسلوا اجرين معلمينهم،واحنا صحيح بنضرب المعلمين وبنبهدلهم، لكن بنرجع وبنبوس اجريهم مش بس بنغسلها، بنبوسها ليسقطوا حقهم عنا.

فعادي بشو اليابان احسن مننا؟

همو نسبة الغلط بالوقت عندهم 7 ثواني؟

احنا

ب 7 دقايق المكلف بتشكيل الحكومة بكون اختار الوزراء،ما بتغلب لأنهم جماعته.

و7 ساعات السكرتيرة لترد ع التلفون.

و7 ايام ليرضى مدير المكتب يستقبلك.

و7 اسابيع والوزير يستقبل تهاني وتبريكات بالوزارة.

و7 شهور وحد من هالوزراء بلشان بتغيير الموظفين اللي عينهم اللي قبله وبتغيير اثاث مكتبه.

ولما بغيروه، بوخذ 7 مليون دينار مكافأة،و7 اعفاءات جمركية، و7 سيارات، وبترك وراه 7 تسبع الشعب كله.

ف ع شو اليابان احسن مننا،هاه؟

#طافح