حكومة الحطب

صوبة الحطب هي البديل لثلاثة أرباع الشعب الاردني عن الغاز والكاز والديزل للتدفئة.

الاردن بكاملها بستعملوها ما عدا عمان، لأن ممنوعة فيها، عشان بتلوث البيئة، خايفين ع بشرتهم من تأثير الدخان اللي بطلع منها ويموتوا ناقصين عمر.

صوبة الحطب مجبرة الناس على استعمالها لتوفير نفقات المحروقات، وتستعمل للطبخ وتسخين المي للجلي والغسيل والحمام.

وعشان سلامة الاطفال، لازم يكون فيه مطرق رمان (عصا رفيعة) طول متر ونص لمترين مع حدا كبير، عشان يظل يهس فيه ع الاولاد ويخوفهم فيه ليظلوا بعيدين عن الصوبة وهو قاعد مطرحه.

قبل 15 سنة من عام 2000 ، كان شعار الأردنيين، أردن أخضر عام 2000.

وبعد 15 سنة من عام 2000، صار شعار الأردنيين، لا لأردن أخضر.

بعام 2015 الشعب مش ملاقي اشي يدفيه، لا كاز ولا غاز ولا ديزل ولا قادر يدفع فاتورة الكهرباء، ورجع يقطع الغابات والشجر، والحكومة ومعالي امين عمان بسولفوا عن السيارة الكهربائية بشوارع عمان.

دولة الرئيس :

معالي العمدة :

لو هضمنا فكرة ان هالسيارات اللي فضحتونا فيها بباريس، بتصرف بس 71 قرش كل 400 كيلومتر عشان تحافظوا ع صحتكوا من التلوث، كيف بدنا نهضم ان بدكوا تركبوا سيارة ب 71 الف دينار واحنا قاعدين بنقطع الشجر، عشان ما نموت من البرد والوحوحة.

على العموم، وبما انكوا معتبرين أن الأردن عمان، وعمان هي الأردن، ديروا بالكوا، ترا كل اللي عندهم صوبات حطب، عندهم مطارق رمان طويلة، اوعوا تمروا بشوارعنا بسياراتكوا الكهربائية، بلاش تشخطها مطارقنا بالغلط و احنا ننهر فيها الولدنة.