#مواطن_مصري في مطار عمان: تقريبا كده كل البنات اللي بيوصلوا لدور ال١٦ في مسابقة miss Jordan بيتعملهم عقد عمل تلقائي في (الملكية الاردنية)
نيسان ـ نشر في 2016-01-02 الساعة 15:59
مصري سافر سياحة الاردن وعندما عاد كتب في صفحته على الفيسبوك عن تجربته:
-سافر علي الخطوط الملكية الأردنية RJ المضيفات في الطيران الملكي الأردني في الحقيقة واخدين course في الetiquette و جابوا فيه امتياز كلهم
ايه دا؟!!
مش ممكن يا جماعة بصوت حمادة امام
ايه الرقة و الشياكة و الحلاوة و الذوق و الأدب دول
و النعمة كنت عايز أقولهم اقعدوا انتوا و انا أقوم اشوف البهوات يشربوا ايه!
بتقولي حضرتك تحب تشرب ايه؟ قلتلها عصير برتقال قالتلي مع تلج بلهجة شامي كده. قلتلها آه قالتلي صحتين.
-تقريبا كده كل البنات اللي بيوصلوا لدور ال١٦ في مسابقة miss Jordan بيتعملهم عقد عمل تلقائي في الخطوط الملكية الاردنية.
-الرحلة ٥٥ دقيقة، يعني لو حد جي من المهندسين يوصلك المطار، هتكلمه من عّمان هيقوللك و انا خلاص أهو علي مطلع كوبري أكتوبر.
-مطار الملكة عالية من أنضف مطارات العالم و أحدثها. يكفي انه حاصل علي جايزة اكثر مطار حصل فيه تطور في الشرق الأوسط كله.
-أول ما تدخل المطار هتلاقي علي موقع المطار مواعيد الأتوبيس لوسط البلد كل نص ساعة في واحد . في مكتب شيك كده بره باب المطار تشتري منه تذكرة ب ٣ دينار و تركب الأتوبيس. حاجات صغيرة بس بتفرق. العملية منضبطة للغاية مش تخرج تلاقي نفسك بتتسلم ل بلطجة سواقين التاكسي.
في طبعا خدمة تاكسي المطار. بالمناسبة، التاكسي العادي ممنوع يدخل المطار. نظام مبهج في الحقيقة.
-الأردن ساقعة في الشتا، مش الشتا الخيبان بتاعنا. درجة الحرارة النهاردة صفر.
-المصريين هنا مسيطرين علي تجارة الخضار و الفاكهة و محلات الفول و الفلافل و السمك.
-أعلام الأردن في كل مكان بشكل مبالغ فيه كما هو الحال في تركيا و في تونس بن علي الا ان صور العائلة الملكية غير منتشرة بكثافة زي باقي الملكيات في المنطقة العربية.
-يا جدعان منطقة الشام دي فيها أحلي أكل في العالم. أي حاجة مهما كانت بسيطة بيعملوها حلو أويييي.
-الأردن شبه لبنان كتير في تضاريس المكان -مش الانسان - و الآثار الرومانية و ذوق الشعب لكن النزعة الدينية الاسلامية (من الناحية الشكلية) هنا غالبة شوية يعني اسماء الشوارع كتير منها علي أسماء الصحابة، في مساجد كتير و الصلاة فيها بتبقي في الميكروفون، مفيش حالة الانحلال الوسطي الجميل في اللبس زي اللي في لبنان للاسف. يمكن عشان الجو برد؟ عموما هبقي آجي تاني أطمن 😃😃.
لكن برضه دا ميمنعش انك تلاقي يافطة زي اللي في الصورة تحت مكتوب عليها (شارع عمر بن الخطاب "صحابي")
أكنك بالظبط كاتبلهم:
شارع كريستيانو رونالدو "لاعب كرة قدم جيد"😃
#شفيق_يا_راجل
- الشعب الأردني ذوق جدا و دا بيبان في طريقة معاملة الناس في لمناطق الشعبية يعني في وسط البلد عندهم محلات بدل زي اللي في وسط البلد عندنا؛ تلاقي واحد واقف و يقوللك (شرفني يا شاب) و هو بيشاور ب أيده و مبتسم.
من كام واحد في شارع طلعت حرب كان هيطلع دراعي في أيده و هو بيقوللي (بدل يا كابتن بسعر المصنع ..و هتشتري)
شارع الرينبو في عمان من أحلي الحتت اللي ممكن تخرج فيها في حياتك. شبه منطقة تقسيم اللي في اسطنبول بس بلمسة شامية تاريخية حديثة لطيفة ظريفة خفيفة عفيفة شريفة مخيفة سخيفة نحيفة...
-الأردن زي الدول بنت الناس عندها public free wifi 😃
- ركبت حافلة في وسط البلد لِسَّه طالع و بسأل حد علي المكان اللي عايز اروحه و بعدين لقيت كل اللي واقفين بنات و ستات ف الولد قالي بحسرة:"عنا نظام أمريكي الشباب جاعد و البنات واقفين". لِسَّه في شوية شباب عربي عندهم نخوة والله.
-البلد مليانة سلالم بشكل خرافي. أعتقد عمان لازم تدخل في تصنيف اكثر مدن العالم سلالما! سخن قبل ما تسافر.
بجد ممكن تفضل تطلع ما بين ٣ شوارع لمدة ربع او تلت ساعة طالع سلالم بس!
-"السائق موجود لخدمة الراكب و مش من حقه يرفض
طلباتك خصوصا انه بياخد اجر علي ها الخدمة". دا كلام سواق تاكسي مش كلام وزير النقل. قالي كده بعد ما شاف ٢ سواقين رافضين يركبوني لأَنِّي معايا شنطة.
#سواق_تاكسي_بعقلية_مساعد_وزير
-عمان صغيرة أوي لدرجة اني قابلت سواق تاكسي مرتين في منطقتين مختلفتين تماما في نفس الوردية 😃😂
-الأردن غالية جدا.
-مستوي تأمين مطار الملكة عالية (اللي في الأردن مش في إنجلترا) يبينلك ان احنا عندنا ناس خريجين معهد دودة الأز مسؤولين عن تأمين المطارات. الإجراءات هنا نفس الإجراءات المتبعة في مطارات أوروبا كلها. و أنا خارج من مطار القاهرة امبارح كان في ايدي شنطة صغيرة بقوله احطها ع السير قاللي هي فيها حاجة؟ قولتله أبدا شوية مخدرات لزوم وعثاء السفر قاللي اللهم هون علينا من سفرنا هذا 😂.
هنا قلعت كل حاجة الا البنطلون.
#البنطلون_لأ
#شفيق_يا_راجل
#البنطلون_لأ
-حصلي موقف غريب جدا امبارح. دخلت أصلي المغرب في المسجد الهاشمي علي ناصية شارع الملك طلال و هو من أكبر ان لم يكن أكبر مساجد الاْردن كلها و عشان الركعة كانت هتفوتني سبت الجزمة بتاعتي بره. مسجد كبير في وسط البلد و ما شاء الله كان ممتلئ عن آخره، و سبحان الله خرجت... و لقيت الجزمة في مكانها😃.
أنا آخر ٤٧٠ مرة صليت فيهم في وسط البلد و جزمتي قدامي و مطوتي في جيبي ...روحت بِالشَّرَاب😂😂😂
#البنطلون_لأ
