شوارع الدواب

نيسان ـ

.

فيه مثل انجليزي بقول: اذا أردت أن تمشي في طريق مستقيمة، عليك أن تهدم بيوت كثيرة.

هالمثل بذكرني بقصة ابو فايق _الله يرحمه_ ، ابو فايق ختيار عندنا بالقرية، كان رايح ع اربد المدينة عشان مراجعة بالمستشفى، فاتضايق من صعوبة الطريق، فقال للسايق : ولك سوق مليح، خضيت جسمي خض، سواقتك بتخلي الحامل تطرح.

فالسايق بحاول يبرر ويقول: يا حجي شو دخلني انا، الطريق عوجا وخربانة.

ويكمل حكي ابو فايق ويقول: ولك امر الله هالشوارع رسمتها وخططتها دواب، يقوموا يعطوا رخص لسواقين بعرفوش يسوقوا.

كلام ابو فايق مزبوط، يعني الدولة رسمت الشوارع من قبل الخمسينيات وخططتها حسب ما كانت تمشي الدواب، وفتحتها ع هالاساس، عشان هيك شوارعنا كلها لفات وكوربات.

لكن انا اللي محيرني بالعلاقة بين المثل الانجليزي وكلام المرحوم ابو فايق، الدواب اللي كانت تمشي بشوارعنا، دواب انجليزية والا محلية.

واذا كان الانجليز فعلا مؤمنين بالمثل تبعهم، معقول لما بدهم يفتحوا شارع بهدموا بيوت وبقصوا أراضي ليكون الشارع دغري، والا بعملوا مثلنا، بزيحوا الشارع عن دار وارض كل واحد واسطته كبيرة ؟