احنا شعب محنط

.

مش عارف منوين بجيبوا هالحكي، ولا بعرف كيف بقرروه، ولا شو الغاية منه، ولا شو بدهم يوصلوا للناس لما بقولوا: اكل لحم الغنم كثير، بعمل ارباك للمعدة.

حدا شايف اللحمة وقايل لا، عليم الله فيه ناس اخر مرة شافوا اللحمة، ايام كان حق الذبيحة 22 ليرة، جيبولهم لحمة وخلي المعدة ترتبك مش مشكلة.

كانوا الختايرية يذبحوا الذبيحة، ويعلقوها وما يخلصوها سلخ الا وهمو ماكلين نصها ني، بوكلوها ني ومولعين معها سيجارة هيشي كمان، وكانوا يعيشوا طويلين اعمار 90 و100 سنة وبأحسن صحة.

وزعوا لحمة للشعب وما تخافوا من الارباك، الشعب عنده مناعة من الارباك اللي بشوفه كل يوم.

الشعب مش بس عنده مناعة ارباك، لكنه شعب محنط، من مواد تحنيط الاموات اللي بطعمونا اياها مع اللبنة والجبنة.

دايرين بالهم علينا، وبعملوا فينا خير بتحنيطنا واحنا عايشين، عشان ما نحس بطعم السنيورة المصنوعة من مصارين الجاج والحيوانات، المصارين اللي المفروض انها لصناعة علف الحيوانات، بطعمونا اياها.

احنا شعب محنط، والا مقتنعين ان شعب عايش ع قلاية البندورة، والبندورة الفغم ومرقة العدس، بظل فيه حيل يمشي ويعيش لولا التحنيط؟

احنا شعب مش بس اجسامنا محنطة، وعقولنا كمان محنطة، والا كان انقرضنا زمان بسبب ارباك السياسة، وارباك التعليم، وارباك الدين، و ارباك الحكومات.

وكل واحد بمسكوه بتهمة التحنيط، احنا الشعب لازم نجمعله الثلاثين ليرة وندفعهن عنه، ويا ريت يلاقولنا مادة اقوى يحنطونا فيها، عشان نبطل نحس بالبرد والوحوحة.

حنطونا وطعمونا اللي بدكوا اياه، ومستعدين نوقعلكوا ع تعهد باخلاء المسؤولية من التحنيط و الارباك، بس ول حنطونا من برد الروح، عشان ما نظل نحس بمعنى الكرامة.