ثقافة الحمرنة والشباشب

اصحى يا قرد، فز يا لوح، تعال هون يا حمار، اقلب وجهك يا جحش، سكر ثمك يا بغل، هات السطل يا سطل، ليش لابس حفايتي يا حفاية، حط تبن للبقرة يا بقرة، ليش تضرب اخوك يا مسقع، انطم مطرحك احسن اربطك،لمين طالع يا كر، هيك ترباية الاهل لاولادهم بالدار.

ع العموم، اهل، وما اختلفنا، سبوا اولادكوا وهينوهم، وانسوا قصص حقوق الطفل، ومنظمة اليونسكو والفضايح اللي فضحتونا فيها بالعالم ان 85% من الاطفال بالأردن بتعرضوا للاساءة ،والعنف من ورا هالمسبات،والبهادل اللي بتسمعوها للاولاد.

لكن اللي مستغربه، لما استاذ المدرسة بضرب الولد، وببهدله عشان مش حافظ درسه، وعشان دز زميله، وما بحترم حدا، ليش بتقوم القيامة، وبتهجموا عالمدرسة، بالشباشب، والحفايات، والعصي ع راس المعلم،اللي بحاول يربيه، ويعلمه، ويخليه مثل الخلق، ويمحي الأشياء الغلط اللي زرعتوها بعقله بالدار.

سبوهم لها لقرود ما اختلفنا، وما خصنا، بس يا ريت بتضيفوا شلونك اليوم يا صايع، تعال خليني اشوف قرايتك يا غبي، شو اخذتوا بالمدرسة يا ابو مخ مصدي، ع الاقل هيك بنقول انها بهدلة الها هدف مش مجرد اهانات، وسب، وتحشاية عقل الولد قذارة، وزعرنة، وقلة حيا.

ليش بتزعلوا من المعلم لما يبهدل الولد، وبتعتبروه عدو، وغريب. مهو لعين الوالدين هالمعلم اخوك، وابن اخوك، وابن عمك، وابن خالك، وجارك، قري، وتعب، ودفع مصاري؛ ليحقق حلمه، ويعلم اولادكوا.

علموا اولادكوا الاحترام، والثقة بالنفس، والادب، احسن ما تعلموهم الحمرنة والثورنة، والزعرنة، واحموهم من انفسكوا مش من المعلمين.