ذبحتونا: 90 % من طلبة الدبلوم والشامل فقراء

قال منسق الحملة الوطنية لحقوق الطلبة " ذبحتونا " الدكتور فاخر دعاس إن 90 % من طلاب الشامل والدبلوم هم فقراء، مشيرا إلى أثر ذلك في عدم تبني مطالب الطلاب رغم سلسلة احتجاجاتهم على رفع أسعار الرسوم الدراسية.

وكتب دعاس على صفحته على الفيسبك ما يلي:

90% من طلبة الدبلوم والشامل هم من الطبقة الفقيرة .. يعني الناس اللي ما حد سائل فيهم .. عشان هيك كل سنة بتصير مشاكل عالشامل واحتجاجات ولا حياة لمن تنادي ..
بس الدورة هاي الأمور وصلت حد غير محتمل، يعني السيرفر ينضرب والطلبة يجاوبوا سؤال يلاقوا الكومبيوتر حاطط إجابة ثانية، غير لما يعلّق الكومبيوتر والطالب يستنى دقيقتين لحد ما يفتح السؤال اللي بعده علماً إنه كل سؤال مخصص إله دقيقة ونص كمعدل ..
أضف إلى ذلك إنه في أسئلة من خارج المنهج وفي أسئلة ما إلها إجابات وغير وغير وغير ( التفاصيل في بيان ذبحتونا) ..
حملة ذبحتونا نظمت اليوم اعتصام بالتنسيق مع الطلاب أمام دائرة الامتحانات بالشميساني، ولما طلبنا لقاء مدير الدائرة رفضوا يلتقوا بالطلاب بوجود حملة ذبحتونا. الطلاب حكوا ما بنلتقي بدون الحملة .. المهم صار اللقاء بوجود شباب الحملة وبعد ساعتين ونص اكتشفنا إنه المدير بده "يتخوث" عالطلاب وما عرض شي ولا وافق على شي.
ذبحتونا وبالتشاور مع الطلاب قررت التصعيد وعشان هيك بكرة راح نكون أمام دائرة الامتحانات في الشميساني خلف كلية الأميرة عالية من السصاعة 11 الصبح وفي خطوات تصعيدية أخرى كثيرة ...
وعشان هذول الناس فقراء .. مطلوب من الإعلام يعطيهم الأهمية القصوى لأنه هذا الدور الحقيقي إله.
رهاننا كبير على حضور إعلامي وتسليط الضوء على القصة والضغط على رئيس الجامعة لغاية تحقيق مطالب الطلبة العادلة.