نتنياهو مِشْ مِحْوَر الكَوْن .. !!

نيسان ـ من كثر ما تابعتُ هالأيّام تحليلات العرب لنتائج انتخابات الكنيست.. فَرْطَتْ «البيلية» تاعتْ عْجال مُخّي..!! تدخل عَ القهوة أو تركب بباص.. فتلاقي المواطن الطفران إللي «عايف روح الدَّخْنَة».. وإللي لو تْطُلّ بجيبته تشوف البحر الأحمر.. قاعد ينفش ريشه بـ»نفخة كذّابة» و»يْشَبْرِحْ» على راسك بالساعات عن «حسبة المقاعد».. وكأنّ «نتنياهو» محور الكون والجاذبية الأرضية.. وكأنّ رغيف الخبز وجرّة الغاز مربوطات بمزاجه الصباحي..!!
يا جماعة الخير.. ليش معطيين الزلمة حجمًا أكبر من حجمه..؟؟ وليش مصوّرينه «فِتُوّة الحارة» إللي ما يهزّوا ريح.. وهو من جوّا «خايخ» ومرعوب من المحاكم والسجن.. وقاعد «يْداغي» باللعب!! المشكلة أنّ بعض أقول بعض محلّلينا الاستراتيجيين يحكون عنه بثقةٍ تامّة.. وهم بآخرتها لا يعرفون «الخمسة من الطمسة»..!!
المصيبة أنّ فينا مَنْ أُصيب بـ»الخَرْعة» المزمنة كلّما طلعتْ نتائج صناديقهم.. فنقعد نلطم إذا فاز نتنياهو.. ونستبشر إذا تقدّم غيره.. مع أنّ كلّ أحزابهم من نفس «حكاكة قاع الطنجرة».. والفرق بينهم مثل الفرق بين «الخروع» و»الملح الإنجليزي»؛ كلاهما يمغص البطن ويجيب الكآبة..!!
الآلآلآلآلآلآلآلآن.. خذوها من «ناقص هزيمات» عَ الصافي: نتنياهو ليس قدرنا المحتوم.. ولا هو شمس الصباح إللي بتطلع بأمره.. هو مجرّد «خيال مآتة» يكبر كلّما قعدنا إحنا على الرصيف نتفرّج عليه ونحسب مقاعده..!! ويوم نبطّل نرهن صباحنا ومساءنا بصندوق اقتراعهم.. ونلتفت لحالنا ولأرضنا ولقمة عيشنا.. ساعتها بسّ رح نكتشف أنّ الزلمة بكلّ هيلمته.. أصغر من «التعريفة» المثقوبة.. وأنّ كلّ عنجهيّته ما هي إلاّ فرقعة بصوت عالٍ في طنجرة فاضية..!!